恨駕女團丨周家怡自爆細個黑人憎 李靖筠分享露營「開大」經歷

娛樂

發布時間: 2024/04/10 13:43

分享:

分享:

周家怡及李靖筠(Gladys)主持的《恨駕女團》。

由周家怡及李靖筠(Gladys)主持的新一集《恨駕女團》昨晚(9日)上架,今集主題是「Y2K」,所以節目組特別借來一輛1999年出產至2002年停產的「Silvia S15」又名「飛雞」拍攝。

跟車主了解完車輛性能後,家怡及Gladys便急不及待上車「走一轉」,二人大讚「好玩、好正」,Gladys表示以前對這種車有誤解,「成日覺得坐呢啲車會好chok,但而家又坐得幾舒服喎。」

恨駕女團丨陳家樂自揭改好BB名  周家怡李靖筠讚對方為好老公

最新影片推介:羅子溢專訪

棍波車好玩又有陰影

家怡則謂以前玩賽車game時,經常見到這款車,亦會選用這車作賽,「成日鏟上壆、撞埋牆,我成日覺得好難控制,但原來其實又唔係好難揸咋喎。油門同剎車嘅高度啱啱好、踭趾一流、可以放心踏、唔覺得佢有好難駕馭嘅感覺。」最後更大叫「棍波車好好玩呀!」

不過提到棍波車,家怡坦言有陰影,「試過泊咗架棍波車喺條斜坡,去完個friend屋企之後去攞車,架車唔見咗喎!原來流咗落去斜坡下面,好彩冇撞到人!其實個hand break我已經抽到好高,到最後check咗都係hand break老化,好驚呀!有陰影呀!以後揸棍波車一去斜路就入定個一波先。」

周家怡及李靖筠主持的新一集《恨駕女團》昨晚(9日)上架。

配合「Y2K」主題拍照

玩完車後,二人特別到一間懷舊餐廳醫肚。開餐期間,為配合「Y2K」主題,節目組開出了「任務」讓二人完成:「自拍一張Y2K感覺的照片」,並提供無框眼鏡及千禧年數碼相機作為道具。

二人隨即戴上眼鏡並不停自拍,不過家怡似乎拍得未如理想,這時Gladys立即充當指導,「我教你,你唔好笑,你一笑就好似嗰啲auntie。」

家怡大感無奈,「人生已經好苦啦,笑吓都唔俾。」十分搞笑。

點擊圖片放大
+4
+3

Gladys兒時偶像  家怡自言細個討人厭

節目組又問到二千年才七歲的Gladys那時候的偶像,向來爽直的她說:「我唔想講呀⋯⋯」然後才道:「我鍾意做醫生有少少鹹濕嗰個。你唔覺得佢個樣成日好似鹹鹹濕濕咁嘅咩?做手術又好鹹濕、好正,哈哈。」

家怡則自爆自己小時候十分討人厭,「去食大排檔我會突然間無端端扮作嘔:『我想嘔呀。』見到坑渠邊我又會扮作嘔:『我想嘔呀。』所以我細個真係好乞人憎㗎。自己彈琴嘅時候,我啲阿哥喺度玩,我就會話:『daddy佢哋好嘈呀。』我真係八婆嚟㗎,公主到不得了。」

至到中三才沒有那麼討人厭,「上咗中學都好啲,但我嗰陣時都唔可以喺街度屙屎,我意思係唔可以喺街嘅洗手間便便。」

話題隨即一轉,二人熱烈地討論如廁話題,原來Gladys到現在亦不能在外「開大」,「要好急先得。」

《恨駕女團》

二人不能在外「開大」

家怡隨即問到拍戲時如何解決,Gladys直言:「所以我拍親都便秘。同埋有時地方好細,化妝間同廁所就喺隔離,我真係屙唔到,會聽到㗎嘛,哈哈。我諗起一單好搞笑嘅嘢,話說我去camping食好多嘢,但嗰個廁所好惡劣,又黑又濕剩係得個窿,好易差錯腳㗎嘛。我哋喺嗰個草地係有好多牛嘅,跟住我就喺度諗:『喺啲牛屎隔離屙應該唔係好覺嘅。』哈哈,我個friend就同我講:『牛屎咁大篤,人屎咁細,聽日天光就會見到……』我最後都冇屙到嘅,我要事先聲明。」

聽完Gladys分享後,家怡即謂:「我哋究竟講緊啲乜嘢,我覺得《恨駕女團》不停挑戰觀眾嘅口味,哈哈。」

點擊圖片放大
+4
+3

現有流動廁所

不過隨後她又忍不住分享一番,「而家拍戲通常book好晒有流動廁所,以前拍戲真係冇,你要去就要去㗎啦,嗰陣時好叻㗎,識得將啲衫綁晒係腰、抽起晒,而家幾好呀。嗰陣時候去泰國拍《無雙》,嗰個廁所真係好靚,佢哋book咗一架專係for拍戲嘅廁所,即係一架車咁樣。」

HKET App已全面升級,TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5

撰文 : TOPick柴犬出動